白銀更勝黃金

金手指 

上星期二，孫柏文解釋過喺負利率世界下，全球大媽、師奶同太太們，都會一個又一個將自己放喺銀行戶口嘅錢提出，再將現鈔放入保險箱。
對個阿太來講，落銀行保險箱攞已存嘅現鈔，同去窗口喺戶口攞功能上冇分別。不過對間銀行來講，就等於擠提。擠提，對成個銀行系統係not so good。咁對銀行系統有威脅，啲央行就要做事。
為見招拆招，迫你放番啲錢入戶口，所以瑞典央行話五年內廢現鈔、德國執政聯盟高層聯同歐央行官員話要廢除500歐元紙鈔、前花旗國財長話要廢除100美元紙鈔、瑞士就話要廢1,000瑞郎。大家唔好諗住唔關我哋事，上周《蘋果日報》都有財經新聞界重量級記者周家誠先生，喺佢篇題為「千元大鈔應該消失」嘅文話：「千元大鈔即將迎來40歲生日，在支付工具繁多的今天，或是時候考慮退休。」

冇錯，周家誠先生唔似外國嗰啲，唔係諗住為迫你返入銀行系統被人㩒住劏，所以叫取消千元大鈔。應該純粹香港填鴨式教育下「外國咁做，我哋也應咁做」心態去寫。不過，我深信最大問題係周家誠先生呢種政策制定嘅心態，就係香港特區政府中班「精英」AO嘅心態。好彩就有曾俊華幫你頂住佢哋先，過多幾年佢退埋休，就連我哋都會落實。
當啲阿太們連現鈔都唔敢囤積，就要開始諗一啲嘢，既能保值，又可擺銀行，流通量又夠，最後仲要可繞過外滙管制，非貴金屬莫屬，仲唔係黃金？去到呢到，你可能會問：「不過你條題明明話白銀勝黃金！」
冇錯，黃金喺呢個恐現鈔作廢嘅氣氛下會長升長有。不過，我個讀者群係一班冇乜資產、得條難命嘅人，即要靠每月收入、平均入市法咁買。白銀一向都係唔係點郁，要被黃金遠遠拋離後忽然最尾牛市三期，火箭式咁追。平均入市法買白銀，真係最賺，所以一定係白銀勝黃金！

孫柏文
獨立股評人