■《經濟學人》30年前嘅預言會否實現？ 互聯網圖片
電腦勒索病毒肆虐，令一張30年前嘅照片重現大眾眼前。該照片上面寫住一個年份：2018年。
bitcoin，勒索病毒指定嘅贖金貨幣。因著其對身份之保密性，現時部份地下交易都會用上，真係知
識型經濟大環境下，黑社會都要進修學電腦。今年2月最後一個交易日，一個bitcoin價格正式超過一盎士黃金。一個大眾將信將疑、本質先於存在嘅虛疑貨幣，一個人類用咗幾千年、存在先於本質嘅實體貨幣，邊一個先係我哋將來嘅交易形態？
《經濟學人》，一本知識份子推崇嘅經濟雜誌。1988年1月9日，雜誌封面畫咗隻鳳凰，心口掛住一枚老蓮咁大嘅貨幣，腳下踐踏多國銀紙，大題《Get ready for a world currency》。鳳凰心口嗰枚貨幣寫住一個年份，就係2018年。
雜誌內文提及將來會出現新貨幣秩序，或由IMF的SDR開始。數字貨幣未出現前，唔少人認為該封面其實暗示黃金皇者回歸。理由係自71年布雷頓森林體系瓦解後美元不斷超發，最終會再次面對特里芬難題，所以美元做莊嘅貨幣體系不能持久，取而代之的將會係金本位。包括聯儲局前主席格林斯潘曾警告，只有回歸黃金，先可以制止全球央行繼續靠印銀紙呢種金融鴉片上電，制止無止境嘅債務擴張。
但自bitcoin出現後，數字貨幣一度令人眼前一亮。同任何新出現的事物一樣，一開始都係被質疑同揶揄。可是經過多年實驗，德國率先於2013年認可bitcoin合法地位，日本今年4月亦承認其支付手段合法，中國則更表明央行會推出自製嘅數字貨幣。
大美元台戲必須唱落去，因為美元一弱，就會有各方勢力倡議用SDR、黃金甚至數字貨幣取代美元。如無意外，聯儲局年末將會縮表，一場虛實之爭即將到來。《經濟學人》嘅預言會否實現？（待續）
大棋局：2018新貨幣秩序（二）
■金本位時代以黃金為錨，第一次世界大戰後美元取代黃金地位。 資料圖片
世上最爽嘅事就係掌有印銀紙權力。印銀紙有內外之別，例如共產黨掌中國印銀紙權力，但國際貨幣體系上冇話事權。用一個通俗講法，政府濫發貨幣在國內威到盡，可以沒收平民財
產，但貨幣出到國外只是一張廁紙，津巴布韋即如此。所以要坐莊，就坐世界之莊。
過去世界貨幣莊家之位係硬通貨，即黃金、白銀。第一次世界大戰後全球陷入大混亂，在布雷頓森林協定下美元取代黃金地位，直到今日。要明白美元體系，要先明白「錨」嘅概念。金本位時代以黃金為錨，自國貨幣含金量高就升值，國與國之間按此再釐定交叉滙率。布雷頓森林體系時期美元以黃金為錨，然後各國再以美元為錨。布雷頓森林體系瓦解後美元背後已無黃金，全球貨幣仍以美元為錨，中國外滙儲備世界第一，就係要表達畀人聽人民幣唔係廁紙。
但以某一國貨幣作錨有個問題，就係所謂的特里芬難題。例如美元體系，全世界都用美元作儲備貨幣，於是美國只有長期貿易赤字先可以輸出足夠貨幣。長期赤字會導致貨幣貶值，阿哥，邊個會揸住日日貶值嘅銀紙？最終引發各國拋棄美元，單一國貨幣做莊之體系不能長久。
美元長期貶值各國心中有數，中國就趁金融海嘯時提過要提升SDR貨幣地位。然而，每當美元信心危機浮現時，美元就會突然轉強。因此所謂的剪羊毛周期不斷重演，特里芬難題一次次被掩蓋。凡事都有「量」嘅問題，美元過去冇問題，不代表將來冇問題，因問題積存嘅量越來越驚人，尤其經歷QE時期。
這邊廂，《經濟學人》竟然30年前預告新貨幣秩序會於2018年出現，並由SDR開始；那邊廂，美國正準備縮表，維持各國對美元信心以冀長玩長有。同時德國靜靜雞運回存於美國的黃金，bitcoin逐漸左右地下經濟秩序。一場新貨幣秩序較勁即將開始。（待續）
大棋局：2018新貨幣秩序（三）
■bitcoin只係一個試驗品，中國已表明會搶先由央行發行數字貨幣。 資料圖片
海耶克晚年最後一本經濟學著作，叫做《貨幣的非國家化》（Denationalisation of Money）。用一句話概括此書重心，就係印銀紙唔一定要
由央行壟斷。既然推崇自由嘅經濟學家們認為有競爭最好，那貨幣發行都應該有競爭先啱。查實世界上有個地方某程度實踐咗上說，就係香港。香港由三家商業銀行發行貨幣，而非由央行壟斷，只不過香港嘅貨幣發行制度欠缺海耶克提倡的競爭性。
叫央行放棄貨幣壟斷，同叫獨裁國家實行民主制一樣，梗係睬你都儍。我哋現行貨幣體系嘅轉捩點，就發生喺海耶克同凱恩斯之爭時期。海耶克受法國經濟學家Jean-Baptiste Say影響，信奉中立貨幣說，認為貨幣失去中立性就會引發經濟危機，故晚年有貨幣非國家化想法。凱恩斯完全相反，認為貨幣唔單止唔應該中立，更應擺到明有搞作，亦即用政治權力玩貨幣。結果凱恩斯打開了貨幣世界的潘朵拉盒子，將貨幣政策放出嚟，往後80年央行以貨幣政策左右經濟秩序被視為理所當然，並一發不可收拾。
看似被塵封的貨幣非國家化理論近年再受關注，因為出現咗一個新事物：數字貨幣。當權者最驟忌數字貨幣的去中心化，每個人只要有相應電腦設備就可以「挖礦」，等同發行貨幣。貨幣在用家之間流轉，不經政府監管、結算。耶倫做聯儲局副主席時已明白地講，新型網路貨幣令銀行家不安，可能擾亂金融秩序。
以最紅嘅bitcoin為例，一粒已比一盎斯黃金貴近一倍。或說bitcoin有排升，因佢係通縮貨幣，最終只能產出2,100萬粒。但今日有bitcoin，聽日可以有beachcoin。bitcoin只係一個試驗品，中國已表明會搶先由央行發行數字貨幣。中國要人民幣國際化，力推SDR，自己發行數字貨幣，用意十分明顯，就係要衝擊美元體系秩序。
（待續）
大棋局：2018新貨幣秩序（四）
■黃金被公認為貨幣中的皇者，任由朝代更迭，黃金永遠不會消失。 資料圖片
黃金，公認為貨幣中的皇者。原因好簡單，法定貨幣壽命取決於朝代更迭，共產黨可以滅亡，共和黨可以執笠，黃金卻唔會消失。無論將黃金拎去208年諸葛亮出山之日，1963
年毛澤東話「一萬年太久，只爭朝夕」之時，還是2047年後唔知點樣嘅香港，照樣有價。
但黃金有一個矛盾處，因其認受性太高，無事好地地，一有風吹草動就會被囤積，直至金本位制度無法運作。故黃金雖為貨幣中的皇者，黃金無法再作為貨幣。
今日我哋嘅貨幣體系不再以黃金為錨，各國貨幣之間滙率與含金量無關。不過將全球央行黃金儲備數據拎嚟睇會發現，15大黃金儲備國（或機構）中，歐美佔8個，若計埋IMF則9個，且數量遠遠拋離其他國家。15大歐美黃金儲備國除瑞士外，黃金分別佔該國外滙儲備55至75%（詳表見網上版）。一方面，不斷有經濟學說同你講黃金冇用，而且講到似層層；另一方面，貨幣世界最高權力掌舵人行動上收埋黃金，並揸到實一實。
《經濟學人》30年前預告2018年會有新貨幣秩序來襲，咁啱今年發生一件事。二戰前德國將大部份黃金儲備送出國托管，到2013年德國突然話要將海外黃金拎番，期限係2020年前運回一半。德國央行今年公佈，截止2016年底已運回583噸黃金，法蘭克福央行總部黃金儲備增至1,619噸，佔其黃金總儲備47.9%。即係話，如無意外，德國央行今年就會提前達標，將一半黃金拎返老家。
QE係一場人類史上最大規模的貨幣實驗，其成敗並未知道。一旦經濟再次活躍，央行收水太慢會引嚟惡性通脹反噬，太急則會導致通縮。全球54萬億美元可交易債券中，央行已揸三分一。央行未完成收水前若出現經濟危機，將無法再次以QE救市。在兩手準備情勢下，哪國先爭奪制高點，那國就係下一代世界貨幣大莊家。
（待續）
2018新貨幣秩序-五
不知道還有多少人記得Bancor和Unita。一場謀劃世界貨幣新秩序的會議發生於1944年，44個國家代表齊集美國新罕布夏州布雷頓森林，英美兩國當時正為誰主導世界爭霸。代表英國出場嘅係殿堂級經濟學大師凱恩斯，佢提倡國際貿易結算用一種新記帳單位Bancor；代表美國嘅只係財政部長助理懷特，佢動議各國用一種新貨幣單位Unita。
結果經濟學大師輸了，各國協議最後雖無採用Uinta，但運用了其原理，即美元和黃金掛鈎，他國貨幣再同美元掛鈎。任何人拎住35美元可以向美國兌一盎士黃金，從此美元又叫做美金。
美國嚴重貿易赤字，各國都驚揸住35美元將來可否兌一盎士黃金？都係沽美元，揸黃金先。SDR即在美元危機背景下誕生，或說，是Bancor重生。可是70年代出現一個叫基辛格嘅猶太人，諗到條橋不單化解美元危機，更將美元一夜間再次扭轉為全球貨幣體系的定海神針，就係要中東國家賣油只收美元。全世界都要買油，所以全世界都要美元。石油美元體系確立，令SDR曇花一現無用武之地。
SDR現時由五大權重貨幣組成，分別係美元、歐元、人民幣、日圓、英鎊。所以中國重提並力推SDR就係要衝擊美元體系，由一個大佬坐莊局面，改變為幾個叔父同檯食飯。過去每當有國家想衝擊美元體系，例如賣石油想唔用美元結算，唔知點解都冇好下場。中國人比較蠱惑，就話大家拍住上有錢齊齊搵。
法定貨幣壽命取決於朝代更迭，假如人民幣世界通行，全球央行揸到一手都係時，冇一個國家會希望共產黨出事。明乎此自然知道，人民幣會否停止國際化，係一件唔需要討論嘅事。
Mr. Tregunter
沒有留言 :
張貼留言