金手指：白銀升十倍？

2006年3月6日，孫柏文正式展開財演生涯。嗰日本欄第一篇文，題為《一注獨贏買白銀》嘅建議。當日，我為白銀定下每盎斯120美元嘅目標價，有效期10年，而因白銀之前收市價係每盎斯10美元，所以就係一個10年升12倍嘅目標價。

而因到本周日，將會係呢個建議嘅到期日，所以今日將會來個回顧。首先，喺我落筆呢刻，白銀每盎斯賣14.86美元，即升咗48%。相比其他資產點呢？


第一當然係要講遠遠跑贏白銀嘅香港樓。用中原城市領先指數計，香港樓10年升142%。如果用盈富基金（2800）當恒指咁計，計埋歷年總共6.67元嘅股息，回報有62%，白銀都係跑輸。

如講港元現金，白銀安全跑贏，因由雷曼爆煲後，港元零息。但如你個戶口係擺喺東亞（023）的話，08年尾可能都要將僅有嘅利息收入，用嚟買驚風散（至於人民幣，你攞得番出香港先同我再講）。

當 然，白銀唔係冇威過。恒指喺呢10年最叻都係喺07年時升上32000點，即由我嘅建議日起計升一倍。但白銀喺2011年初時，升過上每盎斯49.95美 元，即5倍。大家眼利，就會留意到嗰刻啱啱好係10年建議時限嘅中間點。當時我諗，5年都升5倍，要升多倍幾，有幾難！原來好難。呢10年，世界金融市場 發生咗好多事。淨係金融海嘯一役，要能預測到兼寫出來，已要喺發生前受千夫所指，話你譁眾取寵。不過更難嘅就係不但要掌握到事發後嘅政策反應（即印銀 紙），仲要估各類資產喺新政策下嘅反應。

多唔好講，你2006年初問當今世上任何專業分析員：「如果聯儲局將基礎貨幣供應升3倍，油價會點？」佢 哋如果唔覺得你黐咗線，真係答你的話，個個都會話天下大亂，不過冇人會估跌一半。所以近年已有一個又一個用價值投資法嘅人投降。咁跟我建議買咗白銀嘅白銀 戰隊成員應該點？下周隊長再續。